”Dung i ninna Jahowa ma: Nunga marpamuati rohangku ala pangidoanmu.” 4 Musa 14: 20

01. Patujolo:

Di jolo ni turpuk on disuru si Musa do 12 halak laho mangkahapi (mengintai) tano Kanaan na naeng siinganan nasida. Dung mulak nasida sian na mangkahapi i terjadi ma dua pandapot na marasing. Parjolo, adong 10 halak mandok: Ndang mungkin taralo nasida angka na maringanan di huta Kanaan. Ai angka ulubalang na bolon situtu do angka halak na tinggal disi. Pola do digombarhon nasida sai hira sihapor do nasida marimbangkon angka halak Kanaan (13:33).

Na paduahon, dua halak sian na 12 halak i ima si Kaleb dohot si Josua mandok, denggan hita manoluk tano i, ai tarpatupa hita do i (13:30). ”Molo lomo roha ni Jahowa mida hita, sai na tolhas do hita togihononna tu tano i, jala basabasahononna do i tu hita, tano habaoran ni susu dohot situak ni loba do i. Alai na so tupa manggunturi hamu dompak Jahowa, jala ndang jadi hamu tahuton mida bangso isi ni luat i, ai hira sagusagu do nasida sohalanta; nunga sumurut pandingini sian nasida, alai Jahowa do pandingini di hita, unang tahuton hamu mida nasida!” (14:8-9).

Alai gumogo do soara ni na 10 halak i jala ditangihon nasida. Alani dipangiar be ma suarana huhut tumatangis polo saborngin. Marmungutmungut ma nasida dompak si Musa dohot si Aron, didok nasida, anggo tong na mate do nian di Misir manang di halongonan on, Boasa tung togihonon ni Jahowa hami tu tano on, asa marragean hami bahenon ni podang, jala jolmanami dohot ianakhonnami ripe tabanon? Nda tagonan nian hami mulak tu Misir? Tole marsangkap dope nasida laho mamillit ihutan asa mulak nasida tu Misir.

Dipapos roha ni si Josua dohot si Kaleb do nasida mandok asa unang mabiar, ala na donganan ni Jahowa do nasida bongot tu huta na gok susu dohot si tuak ni loba i, alai marsangkap do bangso i mandangguri nasida nadua dohot batu. Alai tahe marsinondang ma hamuliaon ni Jahowa di bagasan undungundung parluhutan i, sude halak Israel marnidasa.

02. Hatorangan

2.1.      Parungutunguton parohon rimas ni Jahowa (ay. 11 – 12)

Hata ni Debata tu si Musa mandok: Sadia leleng on insahan ni bangso on Ahu? Sian i tarida ndang ditanda nasida holong dohot asi ni roha ni Debata maradophon nasida. Ndang porsea nasida sada tanda na gagal do i nasida mangantusi hasatiaon ni Debata tu nasida di tingki na salpu, dang porsea nasida di Debata dohot di HataNa. Sian cara marpingkir nasida ndang boi be Debata gabe parsigantungan di sude partingkian.

Porsea tu Debata berarti, manjangkon sude aha na dihatahon Debata songon hasintongan jala mangulahon na nidokNa, marsigantung holan tu Ibana, jala manghaholongi Ibana sian nasa roha (5 Musa 10: 12). Songon si Abraham na porsea di Debata jala gabe hatigoranna do i dietong Debata (1 Musa 15: 6; bd. 1 Musa 6:9; Job 12:14).

Sabalikna molo so porsea hata ni Debata mandok: ”Naung dapotan hangoluan na salelenglelengna do na mangkaporseai Anak i; alai na so mangoloi Anak i, ndang idaon ni i hangoluan; sai na mian do tahe rimas ni Debata di ibana.” (Joh. 3: 36).

Ujung ni parungutunguton nasida i di sangkapi Debata parohon uhum tu nasida: ”Toruangku nama nasida marhite sian begu antuk (penyakit sampar) jala rendephononku nasida” alai anggo su Musa bahenonna gabe bangso na gogo jala gumogo sian nasida.

2.2.      Musa mangondihon bangso i (ay. 13-16).

Tarida do habuluson ni si Musa na gabe tiruan di hita. Habuluson ni ibana ndang gabe mamikirhon holan kepentinganna sandiri alai Goar ni Debata do na ingkon marsangap di ibana ndang goarna. Ndang gabe kesempatan i didok roha ni ibana molok didok Debata bangso i toruanna alai anggo ibana gabe bangso na bolon jala na gogo. Alai reputasi ni Debata do dipatujolo ibana. Maila do Ibana molo gabe didok halak, ”Ala na so tuk gogo ni Jahowa manogihon bangso on tu bagasan luat, naung niuarihonna tu nasida, umbahen dipotongi nasida di bagasan halongonan.” (ay.16). Sandok sai unang ma nian ro uhum ni Debata tu bangso i jala Debata ma na marsangap ro di salelengni lelangna.

2.3.      Sai marpamuati ma rohaM (ayat 17 – 19)

Tangkas do diboto si Musa ia Debata i ma Na lambas do roha ni Jahowa jala parasi roha godang, na marpamuati do rohana mida hajahaton dohot pangalaosion, alai mangihut tusi diokui ibana do na so loasonna malua sian uhum anggo halak parsala, sai na luluhononna do hajahaton ni amaama tu angka anakna ro di sundut patoluhon dohot paopathon.

Na niigil ni si Musa sian Jahowa i ma Asi dohot HolongNa jala na marpamuati mida hajahaton na niula ni bangso. Asa anggiat nian dilehon Debata dope partingkian, dilehon Debata nang pengampunan tu bangso i (1 Raja 8: 34; Psalmen 85: 3; 103: 3).

2.4.      Nunga marpamuati rohangKu (ay. 20).

Ditangihon Debata do pangidoan ni si Musa jala marpamuati do Debata maradophon bangso i. Saluhutna i alani pangondihonon ni Musa do i. Songon uluan ibana di tongatonga ni bangso i sai dipingkiri ibana do boha asa malua sian uhuman ni Debata ndang kepentinganna di pingkiri ibana, alani gabe marpamuati Debata maradophon nasida alani si Musa.

Alai pengampunan ni Debata ndang na gabe murahan. Adong do konsekuensina. Sude na manginsahi Jahowa ndang jadi idaon nasida tano i. Na marumur 20 taon tu ginjang angka na marmungutmungut dompak Debata ingkon dibagasan halongonan do nasida marragean. Ingkon 40 taonnai ma nasida lelengna di parhorsihan asa tung ditanda nasida Debata. Jala angka baoa na sinuri ni si Musa na 10 halak na mambahen marmungutmungut bangso i jala pararat barita na roa taringot tu tano Kanaan hona torutoru di adopan ni Debata (4 Musa 14: 21 – 23, 27 – 37; bd. 2 Sam 7: 14).

03. Panimpuli

Ndang porsea bangso i tu hagogoon ni Debata i do umbahen na marmungutmungut nasida jala ditulak nasida sangkap ni Debata na denggan. Hape nunga mansai godang diida jala diadopi nasida angka halongangan na pinatupa ni Debata na mambahen nasida boi haruar sian parhatobanon Misir (ay. 11). Koras jala jogal do nasida. Ndang porsea na tuk do Debata mambuan nasida masuk tu tano Kanaan? Diburai nasida Debata, gabe ro ma rimasNa naeng manundati sangkapNa jala mangalengsehon nasida marhite sahit begu antuk (ay. 12). Gabe tudutudu do on di hita, ala na so porsea gabe manulakhon sangkap ni Debata dohot mangaraguhon hagogoon ni Debata.

Si Musa, naposo ni Tuhan i mangelekelek  dohot mangigil holan asi ni roha ni Debata asa tung dipalua Debata bangso i sian uhumanNa marhite na sai tongtong mambahen Debata marsangap. Ndang lomo rohana gabe ndang marsangap Debata ala ni uhuman na pinasahat ni Debata (ay. 13-16). Ndang tarantusan ni bangso na asing i alani dosa nasida do umbahen na so boi, alai ala na so mampu do Debata didok roha nasida. Ingkon saut do sangkap ni Debata, ima na masuk nasida tu Kanaan (ay. 16). Umbalga do asi ni roha ni Debata sian sian dosa dohot pangalaosion ni jolma i (ay. 17-19). Alani do mangido si Musa asa marpamuati Debata di pangalaosion bangso i.

Marsangap do Debata di adopan ni si Musa jala dihaholongi si Musa do nang bangso i. ndang dilului ibana hasangapon tu dirina sandiri (ay. 12). Songon i ma na gabe karakter ni naposo ni Tuhan i. sadar do ibana ndang adong holan naposoNa sambaing do ibana jala na tunduk holan tu Debata, alani do sude haputusan saguru di Debata do (ay. 18-19). Asa hak ni Debata do manguhum manang mangampuni.

Songon halak na porsea jala naung manjalo haluaon sian Tuhan Jesus Kristus, naeng ma songon si Musa na marnapunahon karakter “mengoloi Debata sian nasa roha jala manghaholongi angka na pinasahat tu ibana. Asa “ganup ma hita mambahen halomoan ni roha ni dongan, laho padengganhon jala pauliulihon.” (Rom 15: 2).